2019年12月20日星期五

2019小總結

好耐冇寫過野,社會發生太多事,政治野拗到你死我活都唔會有結果,就算我認為係咁咁咁,你認為點點點,有能力,有影響力既社會賢能提議當權者可以點樣修補殘局,當權者一意弧行,大局你我都無力改變。

臨近年尾,返埋呢幾日工,放十日假,為自己今年作一個小小既總結:

工作:

工作上今年多左挑戰,主要在於做左三年幾野,唔再好似一開始做野咁冇乜責任,開始要負責多左野,做多左幾個Project,接觸既野唔在局限於散仔角度。都因為咁,年尾收到一個好消息,一月升職加人工,而幅度都唔錯。距離自己既目標又近左少少。

旅行:

四月去左台灣,十月去左紐西蘭,紐西蘭立即成為左我最鍾意既國家,風景優美,生活成本又唔高,當地人好親切又愛護大自然,又接受外來文化,野食又多元化。將來既Plan B,絕對可以考慮!(係移民門檻都幾高,我做既職業又唔符合技術移民,只好儲多幾個錢,睇下將來有冇機會)

投資:

港股倉固然趺左唔少,領展繼續核心持倉,係香港生活,對沖生活成本。美股所持有既AAPL都升左唔少,冇太多野想講,領展見新低既時候入左少少,繼續股票為主,現金為副,係呢個後QE年代,持有大量現金成本太大。



感觸:

其實香港人好善忘,仲記得身邊好多朋友以前成日北上食海底撈飲喜茶,經過左過去幾個月,唔少朋友一百八十度大轉向,其實香港人受軟唔受硬,過去咁多年溫水煮蛙,慢慢融合,好多人不知玩得幾開心。

在位者係要將所有台底野、血腥腥既真相放哂上台,結果推最後生最冇資產最難走果班走到最前,何苦要逼人太盡呢?

將來?

幾個月之前天真相信以為香港可以變返以前咁,香港既核心價值仲存在。經過左中大果晚,醒覺知道一切只係幻想,只係自我催眠。

六月果時寫文已經明白要有Plan B,半年之後既今日,本來仲想催眠自己香港冇變,香港仲可以去返以前咁,睇見政府每次火水救火,雙重標準,今時今刻已經知道冇得返轉頭,Plan B既計劃,只能夠默默進行,成為若干年後要做既事,希望到時逃生門未關,仍有路可走。

尾聲:

Anyway,既然已成定局,只能夠著眼自己既目標,繼續前行,人工加左,每個月可以儲既錢又多左一舊,希望早日財務自由!

財務自由,想做甚麼就做甚麼;最重要是,可以不做甚麼,就不用勉強。


沒有留言:

發佈留言